Njemački kontraobavještajac optužen za izdaju: Prosleđivao povjeriva dokumenta Rusiji

Jedan službenik njemačke kontraobavještajne službe i njegov poznanik optuženi su za izdaju, jer su navodno prosleđivali Rusiji povjerljiva dokumenata, saopštili su tužioci.

Obavještajac“ Karsten L.“ uhapšen je u Berlinu 21. decembra prošle godine, a drugi osumnjičeni, njemački biznismen „Artur E“, uhapšen je na aerodromu u Minhenu 22. januara, kada je doputovao iz SAD.

Njemačka Federalna obavještajna služba (BND) je u vrijeme prvog hapšenja saopštila da je uključila tužioce u slučaj odmah pošto je interna istraga potkrijepila sumnje o izdaji.

Federalni tužioci su danas rekli da se Karsten u maju 2021. L. upoznao sa Arturom E. koji je bio u kontaktu sa izvjesnim ruskim biznismenom, povezanim sa ruskom obavještajnom agencijom FSB.

Njih trojica su se navodno sastala u septembru 2022. i dogovorila da osjetljive informacije BND-a proslijede FSB-u.

Karsten L. je u dva navrata, od sredine septembra do početka oktobra prošle godine, pribavio devet dokumenata u vezi sa njemačkim projektom prikupljanja tehničkih obavještajnih podataka, koje je odštampao ili fotograsao sa ekrana svog kompjutera, navodi se u saopštenju tužioca.

Zatim je Karsten L. taj materijal dao Arturu E, koji je spise fotografisao, odnio digitalizovane podatke u Moskvu, odštampao ih i na sastancima s ruskim oficirima ih predao FSB-u.

U septembru 2022. službenik FSB-a je Arturu E. dao spisak „pitanja od posebnog interesa“ i Karsten L. je pribavio odgovore, rekli su tužioci.

Po njihovim navodima, Karsten L. je dobio najmanje 450.000 eura od FSB-a, a Artur E. najmanje 400.000 eura u gotovini.

Artur E. je ovaj novac preuzeo u Moskvi u novembru 2022. godine.

Karsten L. je potom organizovao da Artur E, kada je doputovao u Njemačku, bude „prokrijumčaren“ pored njemačkih carinika, navodno iz profesionalnih razloga, tvrde tužioci.

Dvojica su optužena na sudu u Berlinu za „zajedničko izvršenje naročito teške izdaje“, rekli su tužioci i dodali su da su informacije, koje su proslijeđene FSB-u, državna tajna.

Njemačka je postala jedan od vodećih dobavljača vojne i finansijske pomoći Ukrajini od početka rata.