Iran optužio SAD da su Izraelu dale zeleno svijetlo za napad na njihov konzulat u Siriji

Šef iranske diplomatije boravi u Siriji gdje se sastao sa predsjednikom Bašarom Asadom i svojim sirijskim kolegom Fajsalom Mekdadom koji su jednoglasno osudili napad Izraela na ambasadu Irana u Damasku, dok je ministar Amirabdolahian poručio "da Amerika ima odgovornost za ono što se dogodilo", prenose agencije.

Iranski ministar spoljnih poslova, koji je ranije tog dana otvorio novo konzularno odjeljenje u obližnjoj zgradi, opravdao je svoje tvrdnje rekavši da Vašington i "dvije evropske zemlje" nisu osudile napad na diplomatsku zgradu.

Amirabdolahian je ponovio raniju prijetnju da će se Iran osvetiti za napad za koji krivi upravo Izrael, a lider libanske šiitske organizacije Hezbolah Hasan Nasralah je takođe danas ponovio podršku te grupe koju podržava Iran mogućem vojnom odgovoru Teherana, što može dovesti i do eskalacije sukoba duž izraelske granice sa Libanom.

Otkako je počeo rat u Gazi, sukobi Izraela i libanskog Hezbolaha su se pojačali. Hamas, koji vlada Gazom i koji je napao Izrael prije šest mjeseci, takođe podržava Iran, kao i koalicija iračkih milicija koja napada američke vojne baze i položaje u Siriji i Iraku.

Izrael smatra Hezbolah svojom najozbiljnijom neposrednom prijetnjom, procjenjujući da ima oko 150.000 raketa i projektila, uključujući precizno navođene rakete koje mogu pogoditi bilo koju kotu u Izraelu. Grupa, koja ima hiljade boraca prekaljenih u borbi tokom 12-godišnjeg sukoba u Siriji, takođe ima arsenal različitih vrsta vojnih dronova