Stoltenberg: Članstvo Švedske će nas sve učiniti sigurnijim i snažnijim

Generalni sekretar NATO-a Jens Stoltenberg pozdravio je odluku mađarskog parlamenta da ratifikuje ulazak Švedske u Alijansu, navodeći da će članstvo te skandinavske zemlje sve učiniti snažnijim i sigurnijim.

On je rekao da su sada svi saveznici odobrili ulazak Švedske u u NATO.

- Sada, kada su svi saveznici odobrili ulazak, Švedska će postati 32. članica saveza. Članstvo Švedske će nas sve učiniti snažnijim i sigurnijim, naveo je Stoltenberg na društvenoj mreži X.

Odobrenje mađarskog parlamenta za pristupanje Švedske NATO pozdravila je i američka vlada.

- Željeli bismo da poželimo dobrodošlicu Švedskoj uz Finsku u NATO alijansu vrlo, vrlo brzo, rekla je portparolka Bijele kuće Karin Žen Pjer, prenose agencije.

Ona je ohrabrila mađarsku vladu da brzo završi proces za omogućavanje ulaska Švedske u NATO.

Nakon odluke Mađarske, očekuje se da će NATO potvrditi ulazak Švedske najkasnije do jula kada je zakazan i naredni samit u Vašingtonu.

Dokument o ulasku Švedske u NATO, nakon što ga je ratifikovala Mađarska, biće poslat američkom Stejt Dipartmentu koji će takođe staviti svoj potpis na dokument i deponovati ga zajedno s ostalim dokumentima zemalja članica NATO-a.

Mađarski parlament odobrio članstvo Švedske u NATO