Vrhovni sud SAD odbacio zabranu pilule za prekid trudnoće

Vrhovni sud SAD donio je odluku da se Amerikankama ne zabrani pristup piluli za prekid trudnoće "mifepriston" (mifepristone) sve dok se ne završe sudske parnice oko tog pitanja.

Vrhovni sud SAD je u petak takođe odbacio zabranu pilule za prekid trudnoće, koju je uveo niži sud, "čime je produžio status kvo“, piše BBC.

Presuda Vrhovnog suda vraća "slučaj mifepristona“ nižem, Petom okružnom apelacionom sudu. Vjerovatno će slučaj ponovo doći pred Vrhovni sud koji će morati da donese najznačajniju presudu po pitanju abortusa.

Sudija Metju Kačmarik u Teksasu, kojeg je imenovao Donald Tramp, 7. aprila je zaustavio odobrenje Uprave za hranu i lijekove (FDA) za mifepriston koji je prije više od 20 godina odobren za upotrebu u SAD.

Sat vremena nakon presude u Teksasu, savezni sudija u Vašingtonu, kojeg je imenovao bivši predsjednik SAD Barak Obama, izdao je zabranu u posebnom slučaju, naredivši FDA da zadrži lijek na tržištu u 17 saveznih država i Distriktu Kolumbija, gdje je abortus legalan.

Presuda u Teksasu jedna je od najbitnijih otkako je Vrhovni sud prošlog ljeta poništio presudu u slučaju Ro protiv Vejda koja je decenijama štitila ustavno pravo žena na abortus.

Pristalice prava na abortus strahuju da bi odluka sudije u Teksasu otvorila put za zabranu postupka prekida trudnoće u saveznim državama koje vode republikanci.