Barselona "pokerom" otvorila novu eru na "Kamp Nou"

Barselona se u velikom stilu nakon 906 dana vratila na još nedovršeni "Kamp Nou" i očitala lekciju Atletik Bilbau (4:0).

Pred 45.157 ljudi, jer su ostali djelovi stadiona još zatvoreni, Barsa je dominirala i Baskijce ispratila kući sa četiri lopte u mreži, te se izjednačila na vrhu tabele sa Realom uz meč više.

Robert Levandovski ušao je u istoriju kao prvi strijelac na renoviranom stadionu pošto je mrežu zatresao u četvrtom minutu, a Unaja Simona su matirali još Feran Tores u trećem minutu nadoknade prvog poluvremena i 90., te Fermin Lopes u 48.

U prvom meču 13. runde La Lige, Selta je u gostima savladala Alaves (1:0) golom kapitena Jaga Aspasa iz penala u 55. minutu.