Dukure u nadoknadi matirao "šumare", Aston Vila sigurna

Imaće Engleska pet predstavnika u Ligi šampiona, ali Notingem Forest je drugim vezanim porazom, ovog puta na svom terenu od Evertona umanjio svoje šanse.

U četvrtom minutu nadoknade golom Dukurea "karamele" su odnijele cijeli plijen, pa su "šumari" ostali praznih šaka. Ostao je Notingem Forest na trećoj poziciji, ali za tri mjesta koja vode u elitno takmičenje do kraja će se voditi velika borba.

Aston Vila koja je opravdala ulogu favorita u gostima protiv otpisanog Sautemptona je jedan od kandidata, a tu su i Mančester siti, Čelsi i Njukasl.

Brajton je remizirao sa Lesterom i plasman u neko od evropskih takmičenja mu izmiče, dok "lisicama" koje su prekinule seriju poraza bod neće mnogo značiti i izvjesna je selidba u Čempionšip.

Rezultati 32. kola Premijer lige (danas): Mančester siti – Kristal Palas 5:2 (2:2) (De Brujne 33, Marmuš 36, Kovačić 47, Mekati 56, O'Rajli 79 – Eze 6, Ričards 21), Brajton - Lester 2:2 (1:1) (Pedro 31pen, 55p - Mavididi 38, Okoli 74), Notingem Forest - Everton 0:1 (0:0) (Dukure 90+4), Sautempton - Aston Vila 0:3 (0:0) (Votkins 73, Malen 79, Mekgin 90+4), Arsenal - Brentford (18.30).