Vratila se Serija A: Milan nadigrao Salernitanu, pobjeda Stankovićeve Sampdorije

Milan je kao gost nadigrao Salernitanu 2:1. "Rosoneri" su poveli u 10. minutu kada je pogodio Rafael Leao na dodavanje Sandra Tonalija.

Aktuelni šampion udvostručio je vođstvo golom upravo Tonalija i to samo pet minuta kasnije, a asistent je ovoga puta bio Braim Dijaz.

Domaći tim uspio je da prepolovi zaostatak u 83. minutu kada je pogodio Federiko Bonacoli, ali do kraja Salernitana nije uspjela da stigne i do poravnanja.

Nakon ove pobjede Milan ima 36 bodova i drugi je na tabeli, dok lider Napoli ima pet više, ali i meč manje.

Salernitana je 13. sa 17 bodova.

Do pobjede je stigla Sampdorija Dejana Stankovića koja je u gostima nadigrala Sasuolo sa 2:1. Poveli su gosti u 25. minutu kada je pogodio Manolo Gabijadini, da bi na 2:0 povisio Tomaso Auđelo tri minuta kasnije.

Sasuolo je smanjio zaostatak golom Domenika Beradija u 64. minutu sa penala, a do kraja meča taj rezultat je ostao na snazi.

Sasuolo je na 15. mjestu sa 16 bodova, dok je Sampdorija sada 18. sa devet.