Žakelj: Najvažnija je pobjeda, sigurno naša najlošija igra u posljednjih mjesec dana

Nije blistala Budućnost Voli protiv Zadra, ali je nastavila trijumfalan niz u ABA ligi.

Upisala je 17. pobjedu i ostala na čelu tabele.

- Čestitam igračima na pobjedi, kao i Zadru, mislim da su odigrali vrhunsku utakmicu, sa mnogo čvrstine, fizički jaku utakmicu, gdje smo mi imali neke probleme. Vidio se malo umor, da smo malo ispražnjeni od svih utakmica i srijede. To se vidjelo po broju izgubljenih lopti u prvom poluvremenu. Najvažnija je pobjeda, sigurno naša najlošija igra u posljednjih mjesec dana ili čak i više, ali biće toga još, jer igrači nisu roboti. Bitno je da se sada odmorimo, glave su bile na utakmicu u srijedu. Moramo da se odmorimo, smirimo glave i pripremo se za sljedeću utakmicu - istakao je Andrej Žakelj, strateg Podgoričana.