Kamil Rast nova svjetska šampionka u slalomu

Trijumfom Švajcarkinje Kamil Rast koja je postala nova svjetska šampionka u slalomu i ostvarila uspjeh karijere skijašice su završile nastupe na SP u Zalbahu.

Rast je slavila je s vremenom 1:58.00, ispred zemljakinje Vendi Holdener koja je bila 46 stotinki sporija, dok je domaću publiku osvajanjem bronze obradovala Katarina Linsberger.

Američka skijašica Mikaela Šifrin je bila peta i nije uspjela da osvoji 16. medalju na svjetskom prvenstvu. Šifrin je rekordnu 15. medalju osvojila u utorak kada su ona i svjetska prvakinja u spustu Brizi Džonson osvojile zlato ekipnoj kombinaciji.

Hrvatska skijašica Zrinka Ljutić imala je velika očekivanja nakon tri ovosezonske pobjede u Svjetskom kupu, ali je zauzela tek deveto mjesto.

Svjetsko prvenstvo u Zalbahu završava se sjutra slalomom skijaša.