PNP: Rast cijena goriva ponovo plaćaju građani, država bez zakona o robnim rezervama

- Zašto kao država nemamo odgovor ili makar bajpas na bilo koji poremećaj u svijetu prouzrokovan ratovima ili nekim drugim krizama? Odgovor je jednostavan: zato što je prethodni režim svjesno napravio sistemske poremećaje kako bi ekonomiju bazirao na švercu, punjenju privatnih džepova, a državi davao infuzije da premosti krize. Pri tome se, opet svjesno, psihološki uticalo na narod da je bolje kada se švercuje nego kada se radi odgovorno, dugoročno i sigurnije - ističe PNP.

Povećanje cijena, naglašavaju, nije samo pitanje goriva.

- To nije samo udar na budžet građana, koji se svakodnevnim povećanjima sve više tanji. Povećanje cijena obesmišljava i povećanje plata, jer rast cijene goriva povlači i rast cijena ostalih životnih potreba - dodaje PNP.

MneStat: Rast cijena nafte ozbiljan udarac za globalnu ekonomiju

Pitaju zašto se više od tri decenije neprestano ignoriše naučna baza, prije svega Ekonomski fakultet, i preporuke koje se u najmanju ruku moraju pročitati i saslušati.

- Jedna od tih preporuka je i Zakon o robnim rezervama i studija koja se, kao i mnoge druge, nalaze u fiokama. Razlog je jasan – nema odgovornosti i nema suštinskih promjena u odnosu na prethodni režim, već se sve svodi na dnevno-političke, a ko zna i kakve druge trgovine, i to na račun građana i države - dodaje PNP.

Pozivaju Ministarstvo ekonomije da se prihvati posla i odgovornosti, kao i ostale činioce Vlade, da sistemski prave odgovore na moguće udare koji se sada ogledaju u povećanju cijena.

- Situacija može dovesti i do nestašice životnih namirnica, medikamenata i naftnih derivata, kao što se dešavalo u prethodnom periodu. Šta građani mogu da očekuju kada nemamo Zakon o robnim rezervama, a kamoli zalihe koje bi davale sigurnost makar za određeni period? Prema tome, ponudite bolje rješenje od povećanja cijena na teret građana. Inflacija kojoj je narod izložen postala je neizdrživa - zaključuje PNP.