IN MEMORIAM: Davor Katić u svakom minutu ćutanja koji steže grlo

Postoje ljudi čije ime se ne izgovara samo uz titulu i profesiju, već uz osmijeh, toplinu i duboku zahvalnost. Jedan od takvih bio je naš Davor Katić.

Vijest da nas je napustio naš dragi Davor ostavila je neopisivu prazninu u srcima svih nas koji smo činili porodicu Mundijala prijateljstva u Ulcinju. Otišao je prerano, u 49. godini, ali je iza sebe ostavio trag koji vrijeme ne može izbrisati.

Davor nije bio samo izuzetni sportski novinar, urednik i profesionalac čiji je ugled prevazilazio granice Crne Gore. Davor je bio temelj. Bio je naš oslonac, naš iskreni vjetar u leđa i učesnik od prvog dana osnivanja Mundijala prijateljstva. Vjerovao je u našu viziju kada su tek malobrojni vjerovali, dajući cijelog sebe, svoje veliko srce i svoje pera svakoj ideji koja je mirisala na spajanje ljudi, na ljubav prema sportu i na očuvanje prijateljstava sa prostora cijele nekadašnje Jugoslavije.

Ulcinj je u Davoru imao brata. Pamtićemo njegovo plemenito lice, njegovu blagu riječ, profesionalnu etiku koja je služila za ponos, ali prije svega njegovu ljudsku veličinu. Radovao se svakom novom susretu pod Starim gradom, svakom zagrljaju sa legendama i svakoj novoj priči o sportu koja spaja, a ne razdvaja.

Teško je pronaći riječi utjehe za njegovu porodicu, redakciju lista „Dan“ i brojne prijatelje širom regiona. Ali ostaje ponos što smo dijelili životni i profesionalni put sa čovjekom kakav se rijetko rađa.

Dragi Davore, tvoj Ulcinj i tvoj Mundijal prijateljstva nikada neće zaboraviti tvoj plemeniti duh. Dok bude trajala ova manifestacija, živjeće i uspomena na tebe – u svakom našem susretu, u svakoj priči kraj mora i u svakom minutu ćutanja koji nam stegne grlo.

Neka ti je vječna slava i hvala za svako dobro koje si nam donio.

Tvoj Mundijal prijateljstva – Ulcinj

Pavle Pepđonović