Demi Mur objavila rijetke snimke s kćerkama i unukom: „Zahvalna sam“

Uz objavu je napisala: „Zahvalna sam. Hvala vam na svim rođendanskim čestitkama!“

Na jednoj od fotografija glumica pozira ispred zlatnih balona na kojima je ispisano njeno ime. Nosila je šareni sako na pruge i pantalone u istom dezenu. Na snimku njene kćerke i trogodišnja Lueta pjevaju rođendansku pjesmu iznad torte ukrašene šarenim svjećicama. Na proslavi su se našli i kolačići ukrašeni fotografijama Demi Mur iz različitih perioda njene karijere.

Sve tri kćerke, koje glumica ima iz braka sa bivšim suprugom Brusom Vilisom, čestitale su joj rođendan i putem društvenih mreža.

Najstarija, 38-godišnja Rumer, objavila je fotografije iz djetinjstva sa majkom, nastale devedesetih godina, kao i fotografiju Demi sa unukom Luetom. Uz njih je napisala: „Srećan rođendan apsolutnoj kraljici i legendi Demi Mur, poznatoj i kao mama i Jaja.“ Jaja je nadimak kojim je unuka oslovljava.

Skaut (35) opisala je majku kao svoj svetionik snage, saosjećanja i gracioznosti. Objavila je i usporeni snimak na kojem njih dvije koračaju prema kameri poput manekenki na modnoj pisti.

Najmlađa, 32-godišnja Talula, podijelila je fotografije iz djetinjstva i napisala da je njena majka izuzetna na monumentalan način.

Lueta je jedino dijete Rumer Vilis, koju ima sa muzičarem Derekom Ričardom Tomasom.

Demi Mur je ove godine glumila u filmu „Aj lav busters“ (I Love Boosters), a uskoro ćemo je gledati i u trileru „Tajrant“ (Tyrant), u kojem glumi sa Džulijom Garner.